


之五
主演 HR 姐 老闆 勞保王|資料核對 勞工處《僱員補償條例簡介》2026 年 4 月版
勞保十二傳說之五・新公司篇
開公司清單:6 件事點排?
註冊 BR 到請第一個員工,勞保唔好漏
勞保王編輯部|勞保十二傳說之五|最後核對:2026 年 10 月 27 日


- 開公司大致 6 件事:註冊公司同 BR、開銀行戶口、簽租約、請員工、開 MPF、買勞保;次序可以按情況調整。
- 勞保係唯一冇寬限期嘅一樣:《僱員補償條例》規定,冇勞保唔可以僱用員工做任何工作,第一個員工返工嗰日就要有。
- 冇買會被檢控:一經定罪最高罰款 $100,000 及監禁 2 年,仲要畀附加費。
- 請人前一個月開始準備:預留時間比較報價、準備文件,返工日前起保。
勞保王唔係保險公司,亦唔係保險中介;報價、建議同出單由合作嘅持牌經紀行或代理行負責。
下面標明「官方資料」嘅係勞工處同法例寫明嘅嘢;標明「勞保王經驗」嘅係勞保王處理查詢見到嘅情況,只供參考。
1. 開公司 6 件事時限一覽
下表整理自公司註冊處、稅務局、積金局同勞工處嘅公開資料,只係簡介;各項細節同最新要求,請以有關部門網頁為準。
| 步驟 | 邊個管 | 時限 |
|---|---|---|
| 1. 註冊公司同商業登記 | 公司註冊處、稅務局 | 有限公司:成立時一併登記;獨資或合夥:開業一個月內 |
| 2. 開銀行戶口 | 各銀行 | 冇法定時限,要求以銀行為準 |
| 3. 簽租約 | 稅務局(印花稅) | 簽署後 30 日內加蓋印花 |
| 4. 請員工 | 勞工處、稅務局 | 聘用可能要交薪俸稅嘅員工:3 個月內交 IR56E |
| 5. 開 MPF | 積金局 | 受僱首 60 日內登記;僱主供款由第一日計 |
| 6. 買勞保 | 勞工處 | 返工第一日就要有,冇寬限期 |
2. 6 件事逐步講
- 1. 註冊公司同商業登記:官方資料向公司註冊處申請成立有限公司,會視為同時申請商業登記,批咗會一齊收到公司註冊證明書同商業登記證。獨資或合夥就要喺開業一個月內向稅務局商業登記署登記(公司註冊處、稅務局)。勞保王經驗買勞保時保險公司會睇商業登記證,業務性質寫得清楚,報價會順好多。
- 2. 開銀行戶口:勞保王經驗我哋見好多老闆都係揀自己平時用開嘅銀行,或者近公司嘅分行,日後有事要去銀行處理都方便。開戶一般要準備公司文件同董事、股東資料,實際要求以銀行為準。
- 3. 簽租約:官方資料租約要喺簽署後 30 日內加蓋印花,逾期最高可罰原本印花稅 10 倍(稅務局)。勞保王經驗租咗嘅地址,就係買勞保時要填嘅工作地點;如果係住宅,大部分保險公司唔接受用嚟報價同出單。
- 4. 請員工:官方資料簽好僱傭合約,講清楚工資、工時同假期(勞工處《僱傭條例簡明指南》);如果員工可能要交薪俸稅,僱主要喺聘用後 3 個月內向稅務局交 IR56E(稅務局《僱主的申報責任》)。
- 5. 開 MPF:官方資料員工受僱滿 60 日,僱主要喺首 60 日內為佢登記強積金計劃;僱主部分供款由受僱第一日計。建造業同飲食業臨時僱員另有安排(積金局)。
- 6. 買勞保:官方資料冇寬限期,第一個員工返工嗰日就要生效。勞保王經驗好多老闆以為同 MPF 一樣有 60 日,結果漏咗。下面第 3 至 5 節詳細講。
3. 第 6 件事:新開公司幾時要買勞保?
官方資料《僱員補償條例》第 40 條規定,僱主冇投保就唔可以僱用任何僱員做任何工作(勞工處《僱員補償條例簡介》)。即係話,第一個員工返工嗰日,勞保就要生效。
好多老闆打過工,記得 MPF 有寬限期,以為勞保都一樣。兩樣係唔同法例、唔同部門管:
| 強積金(MPF) | 勞保(僱員補償保險) | |
|---|---|---|
| 邊個管 | 積金局 | 勞工處(《僱員補償條例》) |
| 幾時要有 | 有登記寬限期 | 員工開工第一日 |
| 可唔可以補返之前 | 按積金局規定 | 唔可以 date back |
MPF 同勞保點唔同、點解唔可以 date back,詳見勞保 date back:同 MPF 唔同。
4. 買勞保之前要準備咩?
- 定好第一個員工返工日:勞保要喺嗰日或之前生效。勞保唔可以 date back,起保日最早只係通知保險公司確認嗰日。
延伸閱讀:勞保 date back 詳解 → - 列出每個員工嘅工種同全年工資:勞保主要按工種同工資計,文職同外勤費率可以差好遠,分開列先準。
延伸閱讀:勞保保費點計 → - 確定工作地址:勞保王經驗工作地址係住宅嘅話,大部分保險公司唔接受用嚟報價同出單;商業登記用住宅地址,就要另外提供實際工作地點。
- 準備好文件:商業登記、業務性質、員工資料。勞保王經驗有保險公司出單前會要近期 MPF 供款紀錄;新公司未有 MPF 紀錄,就可能要已簽嘅僱傭合約。
延伸閱讀:報價要準備咩資料 → - 預留時間比較報價:建議最少提早兩星期搵我哋報價,留足時間比較唔同報價,核對報價單上嘅工種、工資同工作地址,老闆揀得安心。勞保王經驗資料一次過準備齊,來回會少好多;高風險工種,保險公司可能要多啲資料,提早開始就唔使趕。
- 出咗單就貼保險通告(NI):官方資料每個工作場所當眼處都要貼中英對照嘅保險通告(勞工處)。
報價免費,你唔使俾錢。點樣收費?
5. 出咗單之後要記住
- 保單同 NI 留底:官方資料勞工督察巡查時通常會睇 NI(Notice of Insurance)同保單;冇勞保被巡查會點,詳見無買勞保、忘記買勞保會點?。
- 人數有變就通知:官方資料請多咗人、工種或者工作地點有變,都要通知保險公司,確保保單包埋所有員工(勞工處)。
- 唔可以喺人工度扣保費:官方資料勞保保費由僱主負責,唔可以喺員工人工度扣(勞工處)。
- 記低到期日:勞保一般一年一張,到期前一個月開始處理續保。
- 到期前提早通知:如你同意,保單到期前我哋會提你,再協助你處理續保;想順便比較其他報價,都可以一併安排。
- 人數有變,WhatsApp 一句就得:請多咗人、工種或者工作地點有變,話我哋知,我哋會轉告出單嘅經紀行或代理行,由佢哋更新保單。
續保報價、出單同保單更新由合作嘅持牌經紀行或代理行負責。Email:info@ecking.hk
6. 生意同勞保掛鈎
勞保王經驗近年好多新公司搵我哋,唔係因為記得要買,而係因為接生意:入 tender(投標)做政府或者機構嘅外判合約、申請上大公司嘅 approved supplier list 或者 approved tender list(認可供應商名單),又或者做大判嘅二三判,對方好多時都要你交公司文件同有效嘅勞保保單。冇勞保,連入 tender 嘅門檻都未必過到。
官方資料以勞工處一份服務合約標書為例,投標表格就要投標者填寫僱員補償保險嘅保單號碼、保險公司名稱同保障期(勞工處標書 LDPT 01/2014,投標表格第 5 部分)。每份標書要求唔同,以標書文件為準。
所以與其等有 tender 先搵,不如請人之前就搞掂。有標書出嚟,勞保文件已經喺手,可以專心準備標書。
7. 老闆自己要唔要買勞保?
《僱員補償條例》保障嘅係「僱員」。獨資或者合夥東主本人唔受條例保障,要考慮個人意外保險;兼職、暑期工同自僱人士點計,詳見兼職、自僱人士要唔要買勞保?。第一次買勞保嘅其他注意事項,可以睇第一次買勞保,老闆 HR 必知 5 件事。
新公司請人?先搞掂勞保
WhatsApp 或者打電話話我哋知行業、工種、人數同返工日,真人同事會講清楚要準備咩資料,再經合作嘅經紀行同代理行幫你比較報價。
Email:info@ecking.hk|星期一至五 9am–6pm
8. 保單常見英文,中英對照
勞保王經驗勞保保單同報價單多數用英文。下面係最常見嘅字眼,可以對住睇;唔明嘅地方,WhatsApp 問我哋就得。
| 中文 | 報價單、保單英文同意思 |
|---|---|
| 勞保 | Employees’ Compensation(EC)員工工傷,法例規定要買 |
| 僱員補償條例 | Employees’ Compensation Ordinance(Cap. 282)香港勞保法例,即《僱員補償條例》第 282 章 |
| NI | Notice of Insurance勞保證明,要貼喺工作地點當眼處 |
| 保單 | Policy正式保險合約 |
| 報價單 | Quotation保險公司提出嘅保費同條件 |
| 保費 | Premium要交嘅保險費 |
| 起保日 | Effective Date/Inception Date保障由呢日開始 |
| 工種 | Occupation/Job Description每個員工實際做咩,會影響費率 |
| 全年工資 | Annual Earnings預計全年工資,用嚟計勞保保費 |
| 續保 | Renewal保單到期再續 |
| date back | Backdating將起保日倒填到過去,勞保唔接受 |
| 強積金 | MPF(Mandatory Provident Fund)退休金供款,同勞保唔同 |
常見問題 FAQ:開公司同勞保
香港開公司要做啲咩?
大致 6 件事:註冊公司同商業登記、開銀行戶口、簽租約、請員工、開 MPF、買勞保。時限見上面第 1 節;其中勞保冇寬限期,第一個員工返工嗰日就要有。
成立有限公司,使唔使另外申請商業登記?
官方資料唔使。向公司註冊處申請成立本地有限公司,會視為同時申請商業登記,批咗會一齊發公司註冊證明書同商業登記證(稅務局)。
新公司未有員工,使唔使買勞保?
條例要求嘅係僱用員工時要有勞保。未請人就未需要,但最好喺第一個員工返工日前起保。
試用期員工使唔使保?
要。保單要包括所有員工,唔理全職、兼職、長工定臨時工,試用期一樣(勞工處)。
勞保可唔可以好似 MPF 咁,返工 60 日內先買?
唔可以。勞保冇寬限期,亦唔可以 date back。詳見勞保十二傳說之十一。
新公司冇 MPF 紀錄,買唔買到勞保?
勞保王經驗買得到。有保險公司出單前會要近期 MPF 供款紀錄;新公司未有,一般可以用已簽嘅僱傭合約代替,以保險公司要求為準。
參考資料(最後核對:2026 年 10 月 27 日)
- 僱員補償條例簡介(勞工處,2026 年 4 月版)
- 投購勞保知多啲(勞工處,2025 年 12 月)
- 《僱員補償條例》(第 282 章)(電子版香港法例)
- 公司註冊處
- 稅務局(商業登記、印花稅)
- 僱主的申報責任(稅務局,IR56E)
- 試用期要供強積金?(積金局,2026 年 1 月)
- 僱傭條例簡明指南(勞工處)
- 服務合約標書 LDPT 01/2014 投標表格(勞工處)
重要聲明:本頁勞保法例同規定整理自勞工處公開刊物,開公司其他步驟整理自公司註冊處、稅務局同積金局公開資料,只屬簡介;勞保王唔提供公司註冊、會計或者法律服務。標明「勞保王經驗」嘅內容來自勞保王日常處理查詢所見。兩者都只供一般參考,並不構成法律意見、保險報價或者保險建議;如有疑問,請向勞工處或專業人士查詢。
